Uuttuut tunngaviusoq
Aningaasartuutinut naleqqersuut
Sanaartornermi aningaasartuut atortunut, sakkunut angallassinermi aningaasartuutinik sulisunullu aningaasartuutinik imaqarpoq. Kisiannili sanaartugassanik suliassinneqartartut akissarsiai, illussanik titartaasartut ingeniørillu iluanaarutai ilanngunneqanngillat. Pisisuttaaq aningaasaliinermi aningaasartuutai naleqqersuummi ilaatinneqanngillat. Sanaartornermi aningaasartuutit ineriartornerannik naatsorsuineq EU-p (Eurostat) nalunaarsuusiornikkut allaffeqarfiata innersuussutaanut naapertuupput taamaammat naleqqersuut nunani allani sanilliunneqarsinnaavoq.
Laspeyresip naleqqersuutaa
Sanaartornermi aningaasartuutinut naleqqersuut tassaavoq Laspeyres-ip naleqqersuutaa. Isumaqarpoq ukiup aallaaviusup aningaasartuutaasa katinneri apeqqutaallutik atortussiat, angallassinermi akit akissarsiallu ineriartorneri uuttorneqartartut. Uuttuummik tunngaviusumik nutaamik naatsorsuinissaq piffissamik pisariaqartitsisarmat, ukioq aallaaviusoq ukiuni arlalinni atuinnarneqartarpoq, taamaakkaluartoq teknologimik ineriartorneq sakkussanillu nutaanik tikittoqartarneranut malinnaasumik naleqqersuummik taarsiisoqartassaaq; Uuttuutit 2013 Juulip aallaqqaataani nutartigaagaluartut naatsorsueqqissaartarfiup januaari 2006 ukioq aallaavittut aalajangiuppaa.
Ineriartorneq piusoq malinnaaviginiarlugu naatsorsuutigineqarpoq uuttuut aallaaviusoq ukiut pingasut tallimallu ingerlanerini taarserneqartassasoq.
Uuttuut tunngaviusoq nutaaq
Uuttuut tunngaviusoq nutaaq 2013 juulip aallaqqaataani naatsorsorneqarpoq, inissiaq pingasunik quleriinnilik, quleriimmi ataatsimi, pingasunik initalik marluk, marlunnik initalik ataaseq sisamanik initalillu ataaseq tunngavigineqarput. 2006-imi naleqqersuummik naatsorsuisoqartalermalli nammineq illuliarineqartartoq Illorput 2000 type 4 taarsiullugu inissiaq (punkthus) ullutsinnut naleqqunnerusoq naatsorsuinermi atorneqartalerpoq.
Naleqqersuut sananeqakkajuttup ineriartorneranut ersersitsivoq, aningaasartuutilli ineriartornerat naleqqersuummut nikinganeqarsinnaavoq.
Atortussiassat, akissarsiat angallassinermilu aki
Atortussiassat, angallassinermi akit akissarsianullu aningaasartuutit naleqqersuutip naatsorsornerani assigiinngitsunik uuttuuteqarput. Atortussiassat 35,5 pct.-imik, angallassinermilu aki 17,1 pct.-imik, sulinermilu akissarsiat 47,4 pct.-imik uuttuuteqarlutik.
Suliaqarfiit immikkoortinneqarneri
Aningaasartuutit immikkoortunut agguagaapput:
· Sulliviit il.il.
· Sanaartorfigiuminarsaaneq
· Tunngaviliineq
· Betongiliineq
· Qarmaaneq
· Sanasut suliaat
· Illuliorneq
· pequsiorneq
· Natilersuineq
· Qalipaaneq
· Erngup aqqutaanik suliaqarneq
· Innaallagialerineq
Suliaqarfinni tamani atortunut naleqqersuut
Suliaqarfinni tamani atortut akiisa allanngorarnerat naatsorsorneqarput, allannguutaasut atortut naleqqersuutaannut atorneqassapput. Suliaqarfinni tamani atortunut naleqqersuutaasoq agguaqatigiissinneranni uuttuutaasutut naatsorsorneqassaaq. Naleqqersuutit taakku qulaani taakkartorneqartunut uuttuummut tunngaviusumut uuttorneqassapput, taamaasilluni ataatsimoorussamik naleqqersuut anguneqassammat.
Sulinermi akissarsiat
Suliaqarfinni tamani akissarsiat aningaasartuutaasup ineriartornera naatsorsorneqassaaq, taamaasilluni akissarsiat naleqqersuutaa pineqassalluni, naggataatigut akissarsiat naleqqersuutaa tamakkiisoq pissarsiarineqassalluni, akissarsianut uuttuut Sanaartornermi aningaasartuutinut naleqqersuummeersut malinneqarput.